Мода, убавина, архитектура, автомобилска индустрија, градинарство, на креативноста ѝ нема крај. Овој пат со оригиналноста се издвојува светот на кулинарството, каде шеќерната уметност достигна едно сосема ново, невообичаено, многу оригинално и воодушевувачко ниво, а во прилог прочитајте за нивниот најнов шеќерен изум кој и вие дома може да го приготвите.

Светот на кулинарството, уште за времето на ренесансата ја запозна публиката со шеќерните скулптури претставувајќи вистински уметнички дела во различни големини направени од шеќер и шеќерни адитиви. Верувале или не, понекогаш истите кулинарски деликатеси биле изработувани од вистински уметници, кои иако не биле готвачи, сепак биле талентирани и за нив шеќерот бил материјал за милион можности.

Денес, самите врвни готвачи веќе станаа своевидни кулинарски уметници во стилот на Микеланџело, а нивниот најнов шеќерен изум е ‘стакленото овошје’ со помош на техника на дување шеќер. Изработено од обичен шеќер и комбинирано со дувачка техника, за час на вашите гости ќе им сервирате вистинско ремек-дело.

Потребни состојки:

  • 270 милилитри вода
  • 450 грама шеќер
  • 35 милилитри јаболков оцет
  • Екстракт со вкус по сопствен избор (пр. малина, јагода, ванила, јаболко, лимон и сл.)
  • Прехрамбена боја по сопствен избор

Посебни потребни кујнски алатки:

  • Кујнски термометар наменет за мерење на температура на вода и течности
  • Силиконски подлоги
  • Пупма или цевче за дување шеќер како на сликите подолу
  • Хигенски ракавици за подобро ракување со лепливата смеса, односно да избегне лепење на кожата со истата.

Чекори во готвењето

  • Измешајте ги заедно шеќерот, водата и оцетот во длабок метален сад. Внимавајте шеќерот да биде од класичниот бел рафиниран, кристален шеќер, наместо кафеав. Сета смета се промешува се додека шеќерот не се растопи.
  • Внатре во металниот сад ставете кујнски термометар. Кујнскиот термометар не треба да го допира дното од садот. Температурата е многу важна, па затоа е оваа алатка е потребна за индикација и следење на состојбата на смесата.
  • Гответе го шеќерот на висока температура се додека не достигне 160°C. Не го промешувајте шеќерот додека се готви, бидејќи во спортивно ќе кристализира. Од време на време, со четка, претходно потопена во ладна вода, избришајте ги ѕидовите од металниот сад. Оваа постапка понатаму ќе послужи како превенција шеќерот да не се рекристализира на самите ѕидови.
  • Истурете ја смесата на силиконски подлоги. Поставете 3-4 подлоги и поделете ја смесата подеднакво врз сите, а подлогите треба да бидат флексибилни за виткање.
  • Дозволете и на смесата да се излади неколку минути, пред да ги додадете екстрактите за боја и вкус. Потоа, додадете неколку капки и од двете содржини и измешајте со поголема дрвена шпатула. Вештачката боја треба да биде во прав, а не течна бидејќи нема успешно да се соедини со смесата. Воедно, од естетски аспект, комбинирајте ги боите со вкусевите. Пример, доколку користите адитив со вкус на лимон, изберете жолта боја.
  • Со помош на флексибилната подлога, свиткајте ја смесата од сите страни или дел од неа, во зависност од големината што сакате да ја постигнете.

  • Професионалните готвачи за следниот и краен чекор користат специјална пумпа за дување шеќер или пак помала пумпа за таа намена (Истите може да се најдат на страни како Алиекспрес за 1 долар). Но, за домашни услови доколку немате пумпа, за алтернатива искористете обично цевче, преку кое дувајќи ќе овозможите струење на воздух во смесата при што таа ќе се прошири и зголеми, во форма и големина на овошјата како праска, лимон, јаболко и слично.

  • Кога веќе ќе имате оформено топче, односно овошје, на местото каде што стоело цевчето ќе остане отвор, а преку истиот користејќи обичен кујнски шприц, по своја желба, наполнете ја стаклената структура со фил кој го обожавате и завртете го наопаку, така што страната со малиот отвор ќе биде свртена кон дното на чинијата. Декорирајте по своја желба.

За крај, послужете и гледајте ги воодушевените и изненадени лица на своите гости! Бон апетит!

Во прилог погледнете дополнителни слики за инспирација: